Goierriko Hitza

Lapurreta egin dute Mutiloako kutxan

Mutiloa Larunbat goizeko laurak inguruan izan zen lapurreta frontoi ondoko kutxazain automatikoan.

e. imaz

Larunbat goizaldean lapurreta egin zuten Mutiloako kutxazain automatikoan. Lapurreta goizeko laurak inguruan izan zela azaldu du Ertzaintzak, Mutiloako bizilagunek zaratak entzun baitzituzten ordu hartan. Herrizaingo Sailak jakitera eman duenez ez dago salaketarik jarrita oraingoz, eta lapurreta ikertzen ari dira.

Hurrengo goizean jakin zuten zerk eragin zituen gaueko zaratak, Kutxa etxeak pilotalekuaren ondoan duen kutxazain automatikoa eta jarrita dagoen lokaleko atea indarrez behartuta baitzeuden. Ertzaintzaren arabera makinaria erabili zuten lapurrek, palanka eginez behartzeko.

Dirua ateratzeko makina duela urtebete inguru jarri zuen Mutiloan Kutxak, Gurruntzain pilotalekuko lokal txiki batean.

Azkenaldian lapurreta gehiago

Kutxazain automatikoan egin duten lapurreta ez da azken aldi honetan egin duten bakarra, ordea. Iñaki Ugalde Mutiloako alkateak jakitera eman duenez herriko Ostatuan ere egin dituzte hiru edo lau lapurreta, azkenekoa duela 15 bat egun.